مشترياتي من أيهيرب | IHERB

مساء | صباح الخير ..
تدوينة جديدة خاصة بالتسوق بناء على طلب الكثير منكم .. 
أنا من عشاق | أي هيرب | وأطلب منه بأستمرار سواء منتجات جديدة أو منتجات عجبتني و أرجع أطلبها .
فـ حبيت أسوي تدوينة خاصة ومتجددة لمشترياتي منه حتى تستفيدون ❤

بدأت شركة أيهيرب صغيرة في عام 1996 وكبرت حتى صارت تلقب بـ ( صيدلية الإنترنت ) .
التسوق عن طريقه أون لاين يعني مالهم فروع أو محلات هي متجر الكتروني فقط .
أستوحوا أسم أيهيرب من | الأعشاب و الطبيعة الخضراء | فالشعار يرمز للحياة الصحية النظيفة .
الموقع صيدلية ضخمة ويحتوي على الألاف من المنتجات :
مكملات وفيتامينات وعناية بالبشرة والشعر والجسم ومنتجات غذائية و الأعشاب وحتى المكياج ومنتجات العناية بكل 
مايخص الطفل يعني باختصار الموقع جامع كل شي من الألف للياء . 
وغالب المنتجات ( صحية أو عضوية ) 
يميزهم :
1- الأسعار , في وقت صيدلياتنا ترفع السعر أضعاف أضعاف أضعاف سعره الحقيقي أيهيرب يعطيك سعر معقول و | رخيص |
 و في متناول أيدي الجميع , يعني يخدم الأغلبية .
2- التوصيل , قياسي وخلال 5 أيام هي عندك ويوصل لجميع الدول والمناطق ومايحتاج بريد أمريكي
3- فيه عروض مستمرة وتخفيضات وأكواد خصم خاصه فيك .

رابط الموقع : أضغطي هنا 

الطريقة جدا سهله وغير معقدة خصوصا أن التطبيق بالجوال أو بقوقل بالعربي مش أنقلش يعني بيكون واضح ..
هذا شكل التطبيق ف الأبل ستور |

ولو بتطلبين من قوقل بدون تحميل كل اللي عليك تكتبين أيهيرب في محرك البحث .

وبعدها عندك خيارين أما تسجيل جديد أو تسجلين دخولك لو عندك حساب سابق . 

بعد ماتسوين حساب جديد ضروري تحطين إيميل تستخدمينه مو إيميل تسليك 😍
لأن كل شي راح يوصل عن طريقه من عروض و منتجات وهكذا .

أهم نقطة | انه يكون عندك فيزة 

من دفتر العناوين حطي تفاصيل للعنوان اللي حابه توصلك الشحنة عليه وأهم شي

رقم جوالك يكون صحيح وبياناتك .

بعد ماتسجلين بياناتك وكل شي يكون تمام أبدي التسوق بأي قسم تحبينه بتكون مكتوبه وواضحة عندك بأعلى الصفحة |



و أخيرا الدفع |
الحلو في أيهيرب كل عملية شراء لكل يكون فيه عادة رصيد مجاني يضاف لك 14 أو 15 ريال .
و أختاري شركة الشحن الموجودة بمنطقتك .

السؤال الأول |هل فيه خدمة الدفع عند الإستلام ؟

لامع الأسف لابد من التسديد المسبق وقت الطلب 

السؤال الثاني | كيف طريقة الدفع ؟

 من المهم يكون عندك فيزة أو ماستر كارد حتى تقدرين تدفعين وطريقة  استخراج الفيزة سهله جدا .
 أنا طلبتها من موقع الراجحي أون لاين وكلموني وبعدها بأسبوع وصلت لي عن طريق البريد
 يعني مايحتاج حتى تروحين للبنك .

السؤال الثالث | هل الموجود بالموقع كله حلال ؟

لا الموقع فيه أشياء كثير مش حلال مثل المصنوعة من جيلاتين الخنزير فالأفضل قبل  شراء أي منتج قراءة
 مكوناته ولو شكيتي في شي تواصلي إيميل مع الموقع استفسري وطبعا ( سكر الكحول ) حلال ويستخدم في 
أغلب المنتجات اللي عندنا بالسوبرماركت يعني عادي لاتحسبونه حرام .

السؤال الرابع| في كم توصل الشحنة ؟

أيهيرب يعجبني فيهم سرعة التوصيل دائما بين 4 إلى 6 أيام والطلب عندك  لكن ممكن تتأخر أحيانا 
حسب شركة الشحن أو المنطقة .

السؤال الخامس| هل الموجود بالموقع أصلي أو فيه منتجات مقلدة ؟
أصلي 100%
كل شي موجود بالسوق وعند التاجرات والصيدليات عادة يكون مأخوذ من أيهيرب  والمنتجات مضمونة وغالبها 
مفحوصة من هيئة الغذاء والدواء الأمريكية 

قبل سنتين كنت فاتحة متجر لطلبات أيهيرب أوفر المنتجات وأعرضها وكنت زايدة على السعر الأصلي تقريبا
10 أو 20 ريال فقط وهالشي لأن غرضي التجارة ولابد يكون لي ربح + أنا أجيب الطلبات وأشحن على حسابي 
فمرة طلبت مني وحدة | حبوب البايوتين | وأعتقد سعرها كان ب 50  و أنا أبيعها ب 70 ريال ..
اللي حصل فيه زبونة طلبت مني الحبوب وهي مستغربه من السعر وشاكة أن المنتجات اللي عندي مو أصلية
لما وصلها كلمتني تحلفني هل المنتج أصلي أو لا ..
على طول أرسلت لها صورة الطلب من الموقع والتفاصيل وكل شي لأن مافيه شي يستحق الجدال مادام عندي إثبات .
لكن ياعمري هي كانت مصدومة من السعر لأن عندها طفل مريض يحتاج حبوب البايوتين وكانت تاخذها من صيدلية 
بالرياض العلبه الوحدة ب 300 ريال !!!! والقهر شهريا تشتريها 
لذلك أنهبلت يوم شافت السعر وقالت لي : والله أني أتسلف أحيانا عشان أشتريها ماكنت أدري أنها رخيصة وب 300 أجيب
 6 علب بالراحة .
فدخلت بعض الصيدليات أشوف وأنصدمت من الاسعار اللي باهيرب ماتتعدا 50 ريال توصل 300 و 400
استغفال وتلاعب وأكل فلوس الناس , مو مشكلة يزيدون لكن مش أضعاف أضعاف السعر 
.
دخلت تويتر وجمعت لكم بعض شكاوي الناس وصدمتهم بالأسعار 

أعتقد واضح لكم الأن كيف  التلاعب اللي يصير في صيدلياتنا مع الأسف الأسعار نااااار ومرتفعه جدا مقارنة بالسعر
الأصلي ومافيه أي مبرر لهم و المستفز بالموضوع القيود اللي فرضت قبل سنة على الطلب من أيهيرب وأكيد السبب
ورا هذا كله معروف مين !!
وكأن المواطن المسكين جالس على بنك عشان يرفعون السعر لهالدرجة المبالغ فيها ...
حبوب الحلبة ب 22 أتوقع أختي شرتها من صيدلية ب 200 😍

لي أكثر من 4 سنوات وأنا أطلب من أيهيرب يعني جربت منتجات كثير من كثرها نسيت لذلك بحط لكم اللي صورهم متوفرة
 عندي مع رأي بكل واحد فيهم ورابطه  لو تحبون تطلبون  .
دائما قبل أطلب أحب اطلع واقرأ وابحث عن المنتجات وعادة أتفرج على المدونة الرهيبة مدونة  أيهيرب بالعربي ماشاء الله 
شاملة ومتكاملة لكل شي و أي شي أبي أعرف عنه معلومات ألاقيه عندهم 
لو تبون شوكلاتات صحية وشبسات وحتى أندومي  جيد وماتعرفون تبحثون بأيهيرب هم ماقصروا حاطين مواضيع 
عن أغلب الموجود بأيهيرب .
أضغطوا هنا حتى تروحون لموقعهم 💛

أو أبحث باليوتيوب وأشوف يوتيوبر وطلباتهم وأخذ الجيد منهم .

الحين راح أنزل بعض اللي جربت وعجبني أو ماعجبني وهل بكرر شراءه وتحملوا الصور كثيرة شوي لأني أبيه مثل المرجع .
و أحرصوا على قراءة التقييم لكل منتج والريفيو عنه حتى يكون عندكم خلفية عن أي منتج تشترونه .

أول منتج | الزيوت

زيت الجلسرين 

الزيت ثقيل شوي ودبق وماحب استخدمه لحاله أضيفه للكريمات أو زبدة الشيا شريته مره وماكررت شراءه لأني
 ماحب الزيت الثقيل ولاني راعية خلطات كثير عشان استهلكه
نقي وطبيعي 100% .

رابط المنتج : 💛

زيت جوز الهند 

جربت نوعين من جوز الهند وحبيت هالنوع يخفف نفشة الشعر لكن مايسوي شي سحري  لايكثف ولا يطول هالشي
 يرجع لإهتمامك المستمر بشعرك وتغذيتك قبل كل شي .
أستخدمه أحيانا مع الخلطات وتقدرون بعد تستخدمونه للطبخ مثل ماهو مكتوب في الوصف 
الزيت | نقي و غير مكرر و غير مهدرج وعضوي

رابط المنتج : 💛

زيت جوز الهند ماركة جارو 

هالمنتج بعد ماشريته ندمت رغم أنه جيد الا أن الشركة المصنعة له بأسفلها حاطة علم أسرائيل وكاتبة بصريح العبارة 
أنها تدعمهم و أعتقد بعد لهم ربح من هالشركة لذلك ماعاد طلبته أبد ×
لذلك أنتبهوا وقت الشراء من هالشركة لو يهمكم الموضوع   .

زيت الأفوكادو 

زيت بذور العنب  

أحب هالزيوت خصوصا بعد الرياضة أو ترطيب بعد الاستحمام خفيفة وريحتها مقبولة ومش واضحة
وزيت الأفوكادو أحب أحطه على شعري بعد م أتحمم على الأطراف .
الزيوت طبيعية وعضوية ومن الأنواع الجيدة ضروري مثل مانهتم بصحتنا من الداخل وناكل كويس 
نهتم بعد من الخارج بإيش نحط على بشرتنا لأن الجلد راح يمتصه بالنهاية .

رابط زيت الأوفكادو:💛
رابط زيت بذور العنب :💗

زيت ماركة ألبا  

أخذته بناء على مدح انسانه أثق فيها وحبيته ريحته جميلة جدا  ومن وصفه بالموقع أنه يعطي :

ترطيب عميق وينعم الجسم  , ريحته جوز هند ومكوناته نباتيه ومايحتوي على برابين .

ورهيب لجسلسة مساج واسترخاء , ترطيبه مايطول لكن أعطيه 10 من 10 على ريحته :)

رابط المنتج :💚

ثاني منتج | صابونة الإفريقية 

الصابونة من مفضلاتي مره حبيتها وللأن استخدمها من كم سنة وتعتبر من الأكثر مبيعا
من مدحهم لها أنها تساعد فالتخلص من حب الشباب ومن تجربتي أنا نفعتني بالأكزيما كثير  وتحتوي على حبيبات الشوفان .

رابط المنتج :💚

ثالث منتج | مرطبان البرعمة 

لي فترة أقرأ عن برعمة البقوليات والحبوب وكيف أنها أكثر قيمة غذائية وصرت أبحث عن جار البرعمة
والقاه غالبا ب 150 وفوق ولما بحثت بأيهيرب لقيته بسعر معقول وشفت كثير أستخدموه والنتيجة رائعة فطلبته 
وأن شاء الله أبدأ هالخطوة قريبا . 

رابط المنتج : 💚

رابع منتج | ماء الورد

هالتونر تقيماته فالموقع عالية جدا خالي من الكحول وأهم شي عندي أنه غير مجرب على الحيوانات

وخالي من البرابين وأشياء كثير تضر البشرة على المدى البعيد .

جربته وحبيته وكان يعطيني شعور أن وجهي فريش ونظيف .

رابط المنتج : 💛

خامس منتج | منتجات مكياج 

أيهيرب عندهم بعض المنتجات اللي تختص بالمكياج والفرش والأسعار حلوة ومعقولة ماجربت أشياء كثير لكن 

بكتب عن اللي جربتهم . 

أول منتج : فرشة للحواجب

وثاني منتج : لتعقيم الفرش 

الفرشة حبيتها كثير وأستخدمها مع جل الحواجب وجودتها جيدة مقارنة بسعرها التافه .. 😊

أما المنتج الثاني فالواقع مافهمت هو منظف ولامعقم لأني جربته بالتنظيف و سيء ماسوا شي فصرت أنظف 
بطريقتي القديمة وبعدها ابخه كتعقيم . 

رابط الفرشة :💚

رابط المعقم :💙

ثالث منتج : جل حواجب 

يعتبر من المنتجات الأكثر مبيعا في أيهيرب 

أستخدمت الدرجة البنية وكانت حلوة مثل الجل وجودته ممتازة مقارنة بسعرة أكيد وعندهم كذا درجة شوفي المناسب لك .

رابط المنتج : 💚

رابع منتج: ماسكرا رموش 

لابأس فيها تعطي مظهر طبيعي للرموش يعني تكثيف خفيف و لاتطول بزيادة تصلح للجامعة أو طلعة خفيفة . 
اذا حطيت مسكرة ثقيله أحب احطها بعدها تفكك لي الرموش وترتبها جربتها مرة وماتوقع أطلبها ثانية . 
فيه وحدة أفضل ويمدحونها ومكوناتها عضوية . 
لكن تقيمها بالموقع عالي جدا وهذا يعني أنها جيدة وناسبت الكثير 

رابط المنتج :💛

خامس منتج: مقشر شفايف 

فكرة المقشر أنه يهيئ شفايفك قبل تحطين الروج تسوين تقشير خفيف لشفايفك به يحتوي على زبدة الشيا
وفيتامين e و أفوكادو , يشيل الجلد الميت من الشفايف حبيته كثير ودايم يخلص من الموقع .

رابط المنتج : 💜 

سادس منتج: مقشر شفايف 

جربت من عندهم فرش ريل تكنيك صراحة روووووووعة لها عندي سنتين أو ثلاث وللأن ماشاء الله

كأنها جديدة , مع الأسف مجموعة العيون والمجموعة من ماركة إيكو صارت من المنتجات اللي توقفوا عن بيعها 

فبحاول أحط لكم مجموعة مقاربة لها . الاسعار جميلة وعملية عكس بعض الماركات فرشة وحدة ب 140 ولا

150 وهالشي صراحة يحتاج ميزانية وانا انسانة مش واو بالمكياج أو مهتمة كثير فحرام أخسر قيمة كبيرة

على فرش وأنا قادرة أشتري منتجات جودتها عالية وممتازة و4 حبات ب 70 ريال !

وكثير ميك اب ارتست يستخدمونها ومعتمدين عليها فأشوفها خيار حلو للي تحب تشتري فرش .

تقدرون تشترون مجموعة وتقدرون تاخذون بالحبة لو ماتبونها كاملة

رابط فرش العيون :💚

رابط فرش الوجه :💗

سابع منتج: إسفنجة

من الضروريات عندي هاالاسفنجة للمكياج جميلة جدا وسعرها معقول 

رابط المنتج : 💚

سادس منتج | منتجات غذائية 

كوكيز 

من الكوكيزات اللذيذة بالنسبة لي ( بالشوكلاته و الشوفان والقرانولا ) وعندهم أنواع كثيرة للي مايفضلون
الشوفان معاه فيه شوكلاته سادة وفيه فانيلا كل وحدة تاخذ حسب ذوقها واللي تحب من نكهات يميز الشركة
أن منتجاتها عضوية وخالية من التعديل الوراثي 

رابط المنتج:💚

خميرة غذائي

كوني نباتيه دائما أحاول أغطي النقص قدر الامكان بالأكل ومعروف حاجة الجسم ل فيتامين ب 12 بحثت كثير عن 
مصادر له وقرأت عن الخميرة الغذائية عند نباتين أتابعهم وتحمست أجربها 
طبعا هي مالها أي علاقة بالخميرة اللي نستخدمها فالعجين ولا تشبها  ×
هذي تعتبر نوع من أنواع البهارات وأستخدمها مع البهارات في أي طبخة و وقت م اسوي جبنة نباتية  ريحتها قوية
 جدا وخلتني أنفر منها بالبداية لكن تعودت عليها الان وصرت أحبها :)
مقارنة بسعرها تعتبر رائعه ولها شهور عندي ماخلصت والكمية كثيرة . أيهيرب فيه أنواع كثيرة جدا للخميرة الغذائية 
مو هذي فقط لكن حبيت أجرب أول شي من هالشركة لأني متعودة عليها .

رابط المنتج:💚

 سكر جوز الهند 

أنا تركت السكر المكرر بالمشروبات والحلويات من سنه تقريبا وصرت أستمتع بالمشروبات بطعمها الحقيقي
مو بالسكر المضاف :) لكن الحلويات تحتاج سكر فكان هذا أفضل خيار سكر عضوي غير مكرر وغير
معدل وراثيا وخالي من القلوتين وفيقن .

رابط المنتج : 💛

 شراب القيقب

 من صرت نباتيه قللت استخدام العسل الا لبشرتي والاستخدامات الخارجية | لأسباب شخصية |
وبدأت استخدام شراب القيقب ودبس التمر  كمحلي طبيعي سواء مع الشوفان أو الحلويات , حجمه مش كبير لكن استخدام
 ملعقة منه أو كمية بسيطة يعطيك تحلية فما راح تستهلكين كمية كبيرة منه فيه أنواع كثيرة وفيه أرخص من هالسعر أنتو
 وقت البحث أكتبوا شراب القيقب واختاروا المناسب لكم 

رابط المنتج : 💙

معجون الكاكاو العضوي الخام

هالشوكلاة الخام يستخدم ل الحلويات وأضفته مع القرانولا مرر ويحتاج تحلينه وأسوي لي فيه دايم هوت تشوكليت 
لكن يحتاج سكر للي مايحبون المر .
معروف ان الشوكلاته الخام مصدر للمغنيسيوم يعني مصدر للاسترخاء والراحة لاحظت من صرت استخدمه مع 
أكلي الجيد  فرقت معاي الدورة كثير وبدال ما أشرب ينسون وماعرف ايش أسوي لي هوت تشوكليت  اذا جتني 
وأحس اني مسترخيه والألم أقل بكثيييييييير من السابق ومزاجي تمام أنا توقعت السبب  منه لأن هو
 الشي الوحيد اللي بهالشهرين دخل لنظامي ومستمرة عليها وهالشهرين الدورة عندي مريحة  أكثر من
 أول | هي تجربة ممكن تكون صحيحة ممكن خطـأ |
المره الثانية بشتري نوع جديد أجرب وممكن أخذ بودرة مش معجون

رابط المنتج :💚

زبدة الفول السوداني بالشوكلاته

من مفضلاتي اللي دايم أطلبها وأحيانا أخذها من الدانوب لو توفرت جدا أعشقها و أحب طعمها نباتية وتعتبر صحية
 نوعا ما لكن مش الأفضل بالسوق فيه غيرها كثير أفضل لكنها خيار  وبديل جيد لي عن النوتيلا أو الشوكلاة 
بصفة عامة و الأهم مافيها زيوت مهدرجة وخالية من القلوتين والفركتوز وغير معدل وراثيا  .
أتذكر كنت اشتريها من كان سعرها 16 ريال والحين أرتفع ل 21 😃

رابط المنتج : 💛

 

جربت هالنوع من زبدة الفول السوداني الكريمية حلوة لكن مارجعت أشتريها لقيت بدائل غيرها وماصرت اشتريها .

رابط المنتج :💚

 قرانولا

قرانولا لذيذة لكن كميتها قليلة ودائما منتهية لكثرة الطلب عليها معها قطع شوكلاه  , شريتها قبل أتعلم أسوي
 قرانولا وماعتقد أكرر طلبها لأني سويت كمية منها  .

رابط المنتج:💚

دقيق الذرة 

مسكت معي هالفترة أتعلم أسوي خبز لنفسي خالي من القلوتين ف شريت هالطحين وان شاء الله أجربه ويكون
 ناجح لأني تعبت من التجارب الفاشلة 😃 شركة ريد ميل معروفة بجودتها ومنتجاتها الرائعة لذلك م اتردد أني أخذ منهم .

رابط المنتج :💚

سابع منتج | مرطب شفايف

أخذته في وقت تخفيضات 8 حبات كانت ب 12 ريال يعني يابلاش 

والحين رجع لسعره الأصلي أعتقد 30 ريال بحثت عن رابطه مالقيت لكن لقيت نفسه بنكهات مختلفة جامعينها 

بنفس هالعلبة وعليه تخفيض الأن ب22 .

رابط المنتج : 💙

ثامن منتج | حبل مطاطي

لي فترة أبحث عن باند للرياضة ( حبل مطاطي ) والقاه بأغلب مواقع الرياضة ب 150 ريال أقل شي  وشفته بأيهيرب 
ب 50 وماصدقت وأخذته .
معاه كيس صغيرة للحفظ و عبارة عن أربع مستويات وألوان كل مستوى موضح عليه قوته
رابط لفديو يوضح بع التمارين اللي نستخدمها فيه : أضغطي هنا .

رابط المنتج : 💚

المنتج التاسع| إسفنجة الكونجاك

أنا إنسانة أبحث دايم عن الاشياء الطبيعية والغير مكلفة للاستخدام وماحب الفلسفة وكثرة الغسول وماعرف إيش 
لأني أشوف ان البشرة تحتاج أهتمام وعناية مريحة مش متكلفة .

اسفنجة الكونجاك غنية عن التعريف خصوصا في بلدان شرق أسيا وتستخدم في تنظيف الوجه بعد المكياج
 و رواسب الدهون  وتشيل الأوساخ . هي تكون قاسية و عشان تلين تحطينها بالماء  وبعدها تستخدمينها 
مع أي غسول تحبينه وطبيعية 100% مصنوعة من ألياف نباتيه .

واذا انتهيتي من استخدامها اتركيها في مكان عشان تتهواء ويفترض كل شهرين تستبدلينها .

رابط المنتج : 💙

المنتج العاشر : ماسكات 

ماسك الطين الأوربي

هالماسك مهمته يخلص وجهك من الشوائب و يشد البشرة ويصفيها وعليه مدح وتقيمات عالية شريته لأنه ينفع
 لأغلب البشرات
طريقته :
تاخذين شوي من البودرة وتضيفين معاها ملعقة ماء لحد مايتكون معاك خليط وتركينه على الوجه مدة ربع 
ساعة الى 20 دقيقة وضروري جدا بعد ماتغسلينه ترطبين كويس لأن الماسك قوي شوي .

رابط المنتج :💚

ماسك النعناع للوجه

من الأكثر مبيعا في الموقع وسعره مقارنة بحجمه ممتاز ريحته تشبه شوي معجون الأسنان 😄
منظف عميق للبشرو ويصفيها من المسامات قبل تستخدمينه نظفي وجهك بالماء وبعدها حطيه 5 الى 10 د 
واغسليه بماء دفي ورطبي وجهك .

رابط المنتج : 💚

ماسك الطين المغربي

شريت هالماسك بعد ماقريت أنه للبشرة الحساسة وأنا بشرتي مهبله فيني وتحتاج عناية مستمرة 
وتقريبا يشبه القناع الطيني الأوربي بكل شي وبالطريقة لكن الفرق أن الأوربي لكل أنواع البشرة
وهذا مخصص للحساسة مره حبيته وبعد استخدامه أحس وجهي يتنفس .

رابط المنتج : 💛

ماسك للأقدام

يجنننننن ويرطب من قلب رجلينك بعده تصير رجل بيبي دايم أطلبه بس تمنيت لو معه كذا حبة مش 1 😩

ومع كذا يستاهل سعره أحب أدلع نفسي كل فترة واسوي سكراب لكل جسمي وأكيد رجليني  لها حق علي .. 😌

طريقة الاستخدام

1. اغسل القدمين جيداً وجففها تماماً لإزالة أي رطوبة.
2. ضع القدمين في جوارب مرطبة وتأكد من أن محتويات السائل موجودة في الداخل.
3. حين ترتدي جوارب الترطيب، دلك القدمين لامتصاص كل السائل.
4. بعد 20-30 دقيقة، قم بإزالة جوارب الترطيب ودلك السائل المتبقي لترطيب طويل الأمد.

رابط المنتج : 💛

المنتج 11 : كريمات

هذا الكريم يرطب بذمة و ضمير لكن عيبه ريحته قوية يعني أفضل أحطه بالبيت ماينفع لو بطلع برا أحسه ريحته
 تزعجني لكن كنت حابة نتيجة الترطيب اللي يعطيني إياها لكن ماتوقع أرجع أطلبه مع أن مميزاته كثيرة
وعلى فكرة يعتبر من الأكثر مبيعا بعد .

رابط المنتج : 💚

زبد جسم بجوز الهند 

 الزبدة حلوة واللي يحبون ريحة جوز الهند راح تعجبهم للأن ماستخدمتها بعمق لكن لابأس فيها وأخذتها بعد ماقريت
 مدح عليها من وحدة اتابعها و أثق بسناباتها . وأهم شي عندي كالعادة أنه نباتي وغير مجرب على الحيوانات .

رابط المنتج : 💚

كريم الكولاجين  

اسوء منتج جربته أنبهرت بالإعلانات والدعايات عنه قبل 3 سنين ولو ماشريته أنهبلت ( الله يكملني بعقلي ) 😔 
أستخدمت علبتين كاملة وأول مره بحياتي أستمر على شي مثل ماستمريت عليه يعنني بتصير بشرتي واو ومع 
الأسف مافيه أي شي يذكر والحمدالله صادف بعدها الصحوة اللي مريت فيها وتخلصت من أغلب المنتجات اللي 
شفت أنها بلا فائدة أو ممكن تضر جسمي أو بشرتي . وعرفت بعدها أن الكولاجين يفرزه الجسم وتغذيتنا لها 
دور وهكذا ومايحتاج هالخرابيط 
وطلعت عليه بعد اشاعات وكلام ماله أخر والحمدالله أني تركته لاعاده الله 😐

كريم افينو

كريم أفينو للأطفال والاكزيما خرررررررافي شوية عليه 
أنقهرت لما صار من المنتجات المتوقف  بيعها على أنه كان ماشي ومطلوب  وتقيمه كويس يرطب من قلب وتحسين 
الترطيب فيك حتى بعد كم ساعة  ووقتها كانت الأكزيما عندي بادية بقوة وهو ساعدني كثير .

بحاول أدور منتج مقارب له من نفس الشركة لأن فعلا خسارة أنه توقف وهو بهالجودة .

رابط منتج شبيه : 💛 

زبدة الشيا ماركة ناو 

طلبتها 3 مرات ترطيبها جيد لكن ماحبيت ريحتها  أحب استخدمها لرجولي قبل النوم أحسها ترطبها
من قلب , وأستخدم لجسمي زبدة الشيا من رؤى الطبيعة لأن ريحتها أخف وحلوة .
لكن الزبدة ممتازة وتعتبر أمنة ومرخصة لأنها عضوية وكنت أستخدمها وقت مافيني الأكزيما  ويبقى ترطيبها 
 أحسن من مراهم كثير خسرت عليها فلوس بدون فايدة غير أن سعرها مناسب وحجم العلبة يكفي لفترة لابأس فيها .
 والأفضل تستخدمينها بعد الإستحمام .

رابط المنتج : 💚

كريم فازلين

هالكريم أخذت فيه مقلب لأن حجمه صغير مره مقارنة بسعره , والغلط أكيد مني ماقريت الحجم كويس

 لكن المميز فيه أنه عضوي ومن شجرة المر مش مثل الفازلين يحتوي على مواد بترولية :)

ويعتبر أمن على البشرة وللجروح أو الحروق مناسب جدا , بـرمضان حرقني الزيت وكان قدامي وحطيت

منه وأنتبهت بعدها أن يدي مابقى فيها لا أثر و لا انتفخت .

فحبيته وصرت أستخدمه للأكزيما ومره رهيب وترطيبه بطل وكمية صغيرة منه تكفي .

رابط المنتج : 💗

مرهم زهرة العطاس

المرهم كبر مصبعي لكن عادي مقارنة بسعره 😁

ريحته فكس لكن ألطف شوي وصراحة ماعرفت وش استخدمه له لأن الريحة ماتساعد فصرت احطه أحيانا على 
عضلاتي لو عورتني .

هو مكتوب للجلد المتشقق فممكن لو جربته بالشتاء أشوف نتيجة .

رابط المنتج :💚

 المنتج 12 : معجون أسنان

كثير من معجون الأسنان الموجود بالسوق مع الأسف هي تجارية وفيها مكونات كثير تضرالأسنان على
المدى البعدي وماتنفعها خصوصا اللي تحتوي على فلورايد أخذت هالمنتج بعد ماقريت الوصف حقه
ولي فتره أستخدمة ومرتاحه عليه وطعمه يشبه ماسك النعناع

الوصف:   

خالي من الغلوتين
يساعد على مكافحة البلاك
خالي من السكرين
خالٍ من كبريتات لوريل الصوديوم

رابط المنتج :❤

 المنتج 13 : صابون المواعين

مدحته وحدة وشريته عشان أروق وأنا أغسل المواعين 😌

ريحته جممممميلة لكن مش خارق في غسل الصحون وماعرف إيش أحب أضيفه لأنه يخلي الريحة حلوة 
وتخليني أسترخي لا تطلع أثيوبيتي وقت والغسيل .

ماعتقد أرجع أشتريه لكن لو خيروني بينه وبين فيري أختاره هو . 

لأن هذا مكوناته تعتبر جيدة ومشتقة من مكونات طبيعية بنسبة 90%

  

رابط المنتج:💛

المنتج الـ 14 : حبوب البايوتين

ثاني اسوء تجاربي 

وكانت النقلة الكبيرة لي اللي تركت بعدها اخذ أي مكمل بدون استشارة أو فحص
قبل 3 أو 4 سنوات كانوا الناس هابين فيه مره وأنه يكثف الشعر 
ويطول الاظافر وماعرف إيش و أن لازم كل شخص يستخدمه وأمن .. الخ ,
انبهرت باللي قريته والتجارب وشريته وجربت علبة وماكنت منتظمة عليها حتى يعني أكل يوم وأسحب يوم
لكن من بعدها صرت ألاحظ ان الدورة اذا جتني أمووت منها 
وبعد ماقريت واستشرت اطباء عرفت أن من أعراضها الجانبية واخذها بدون استشارة ممكن 

يسبب تقلصات ومشاكل بالمعدة و التبول بكثرة حتى لا قدر الله ممكن يسبب اجهاض لو زادت النسبة عن الحد المعقول للحامل .. 

واكيد اللي ياخذونه عشوائي مايعرفون الكمية المناسبة لهم .

كانت تجربة سيئة لكن أعطتني درس قيم 
وللأن م استخدم أي شي الا اذا جسمي يحتاجه وبعد الفحص والتحليل ومعرفة النقص .

وهذي نصيحة مني :
مافيه شي اسمه حبوب او مكمل أمن ومناسب للجميع هذي خدعة للترويج
الجسم مش آلة ولا فار تجارب ندخل كل شي فيه لازم نكون أكثر وعي ونعرف النقص وين ونعوضه وهالشي مايكون
 بالاجتهاد الشخصي يكون بالتحليل والفحص الطبي .
ممكن منتج جيد جسمنا مايحتاجه ينقلب علينا بالسلب ويضرنا مثل ماصار معي

أعتذر جدا ماتوقعت أطول بالموضوع لهالدرجة لكن مشترياتي كثيرة والبحث عن رابط كل منتج أخذ مني
وقت لأني حبيت أحط عدد كبير من المنتجات حتى تستفيدون . 
أخيرا أهم نصائح قبل التسوق : 

1- أقري مكونات المنتج واحرصي تكون غير معدلة وراثيا وعضوية
2- شوفي التقيمات والرفييو على المنتج هالشي يساعدك أحياانا لكن مش بالضرورة أن التقيم العالي يعني أن المنتج الجيد .
3-أقري في مدونة أيهيرب بالعربي عن أي منتج يعجبك ماشاء الله كل شي فيها
4- مو بالضرورة تشترين اللي أنا شريت أنا اخذ اللي احتاجه ويناسبني وشاركتك إياه حتى تستفيدين لو عجبك شي .
5- ابتعدي عن الحبوب والمكملات وأي شي ممكن جسمك مايحتاجه .
,

الصور من تصويري الشخصي ..
أتمنى تشاركوني أسماء منتجات جيدة .

3 comments مشترياتي