النحافة | أسبابها + كيف تتخلصين منها

هالتدوينة بتكلم فيها عن أمور مهمة عشان كل وحدة تحاول تعرف السبب الرئيسي لنحافتها   وبتطرق بالتفصيل لأغلب المشاكل وأسبابها والحلول مهما كان الموضوع طويل لاتبخلين على نفسك بتثقيفها لأن معرفة المشكلة هو نصف الحل . 

- النقاط اللي راح أتطرق لها هي :

*أسباب النحافة ؟

*كيف ممكن أسمن بطريقة سليمة وصحية ؟

 *أول موضوع بتكلم عنه هو | أسباب النحافة ؟ 

في بعض البنات تعتقد أن هي نحيفة وتعيش هوس النحافة بينما جسمها فالمعدل الطبيعي والسليم , فمتي ممكن أطلق على شخص أنه فعلا يعاني من النحافة ؟
اذا كانت مؤشر كتلة جسمك أقل من 18 فأنتي تعتبرين أقل من المعدل الطبيعي وحتى تعتبر نحافتك شديدة .

أدخلي هالرابط حطي وزنك وطولك وراح يعلمك لو وزنك طبيعي أو أقل أو أعلى .

http://www.moh.gov.sa/HealthAwareness/MedicalTools/Pages/BodyMassIndex.aspx

سبب وراثي :

 ممكن عائلتك كلهم أو الأغلب منهم نحاف وهذا مايعني أنك مستحيل تسمنين لكن ممكن يكون سبب .
سبب هرموني :

 ممكن يكون عند خلل بأحد الهرمونات المسؤلة عن الجوع أو الشبع أو الحرق في جسمك 
سبب مرضي :

ممكن بعض النحاف يكون عندهم مرض ( الله يشفي مرضى المسلمين ) وهالمرض يقلل من الشهية أو يعدمها
أسباب طبيعية :

 وهذا اللي أغلب النحاف يعانون منه اللي هو ( تناول كميات قليلة من الطعام لحد ما تتقلص معدتك وتكون صغيرة ) , ( كثرة الحركة ) 
الإصابة ببعض الأمراض العضوية :

 مثل فرط الغدة الدرقية , فقر الدم الحاد وفيه أمراض تكون متعلقه بالجهاز الهضمي 
الإصابة ببعض الأمراض النفسية :

مثل الإكتئاب , الهوس في اتباع نظام غذائي للتخفيف : بعض النحيفات كانت في السابق سمينة واتبعت نظام غذائي نحفت عيه لكنها ماقدرت بعدها ترجع تسمن 

اذا كانت مشكلتك ( هرمونية – مرضية ) أول الحلول هو الفحص الشامل لمعرفة الأسباب الأساسية ويتم صرف الأدوية المناسبة لك, أما اذا كانت مشكلة نفسية لاقدر الله الحل ( العيادة النفسية – اللجوء لله (
أما الأسباب الطبيعية فهذي مربط الفرس لأن هذي بيدنا أحنا نغيرها ونكون أفضل صحيا وجسديا .

نجي لأسباب النحافة اللي أحنا السبب فيها :

أول شي وقبل تبدين تقرين ضروري تكونين صريحة مع نفسك  وتركزين على كل سبب راح أكتبه
أول نقطه مافي شي اسمه اكلت لي قلت بس ومع كذا م اسمن !! لأن مستحيل تكون تغذيتك صحيحة وتكفين فاليوم احتياجك من  السعرات ومع كذا ماتسمنين!
ممكن تكونين :
1- تاكلين كثير لكنه أكل غير صحي وكله دهون ويستهلكه جسمك ويحرقه ولاتستفيدين منه
2- ماتلتزمين بوجباتك الأساسيه وأكلك كله شبساات وأندومي .... الخ 
3- تجوعين فترة طويلة بعدين تجين وتاكلين كل اللي قدامك ترا هذا مايعني انك بتكفين احتياجك بالعكس جسمك راح يخزن كل اللي كلتيه ويوزعه عشان يغطي احتياجه طول فترة تجويعك  ❌
4- وقت رياضتك تجهدين نفسك وماتستخدمين اثقال أو تمارسين تمارين الكارديو بكثرة ؟ ممكن تتحول النتيجه لتنحيف مو تسمين 
5- جسمك يحتاج مثلا ٢٠٠٠ سعره باليوم وأكلك القليل مايوصل 1000 سعرة فماراح يزيد وزنك !

6-يوم تاكلين تمام وأيام تنطشين ماراح تشوفين نتيجه
7- حالتك النفسية زفت وتقطعين الاكل كله وماتشتهين الأكل وتعاقبين جسمك  المسكين على أسباب ممكن تكون تافهه ؟ 
أنتي تحكمي بنفسيتك ولا تجعلين زعل احد منك أو زعلك أنتي على أحد ينظلم فيه جسمك وصحتك
8- عدم الاستمرار وقلة الصبر و استعجالك للنتيجة | يعني بأسبوع تبين تزيدين ثلاثة كيلو ! أتقي الله 

هالخطوات اللي راح أكتبها لكم هي المفتاح الأساسي للبداية والتغير قد م أقدر ألخص لكم كل شي وأسهله وأبسطه بأسلوب واضح حتى ما تقولون | قرينا ومافهمنا | فإذا فعلا يهمك تتغيرين أقري كويس وركزي ودوني المهم . 

مافيه شي بيغيرك أذا مانويتي أنتي تتغيرين هذي أول نصيحة بقولها لك قبل أكمل التدوينة , لاتستهينين أبد بالنية الخالصة وتوكلي على الله وأطلبي منه أنه يعينك على هالأمر .

النية : يعني أن أنتي مؤمنة بأنك راح توصلين لهدفك وراح تتغيرين للأفضل , النية يعني مافيه استسلام وفيه مواصلة واستمرار فإياااك ونسيانها .

أول خطوة :

التغير يبدأ من زيادة كمية أكلك , لكن - زيادة بالتدريج يعني يفضل يكون ( 6 أو 5 ) وجبات باليوم
مقسمة كالتالي : 3 وجبات رئيسية 3 وجبات خفيفة وماتكون قريبه من بعض عشان ماتملين معدتك وتغتثين
و يكون بين السناك والوجبة وقت من ساعتين لثلاث  وضروري ماتنسين التنويع بأكلك ( بروتين – كارب - دهون صحية )
طبعا كونك في البداية تدرجي بالموضوع يعني أول أسبوع زيدي فقط وجبة وحدة على وجباتك المعتادة وإذا تعودتي عليها 
زيدي وجبة ثانية وهكذا يعني لاتغطين على نفسك من أول يوم وتاكلين فجأه فوق طاقتك واستيعاب جسمك .

لو شهيتك معدومة بكتب لك بعض الأشياء اللي تساعدك :

١- ملعقة عسل على الريق 
٢- ملعقة ماش او حلبة مطحونة على الريق 
٣- الراحة النفسية تلعب دور كبير فالشهية اذا تعصبين وتنفسين على كل شي مستحيل تزين شهيتك .
4- الرياضة تساعدك كثير بفتح الشهية وتعديل المزاج
5- الفواكه منها ( البرتقال ، الموز . العنب .. الخ (

6- الخضروات ، وخصوصا الورقيات منها ( خس ، جرجير ، بقدونس ( 
سوي لك سلطات خضار تفتح لك حتى نفسك وقت الاكل .
7- الحركة . خمولك وكسلك وكثرة التسدح ماتعطي جسمك مجال يجوع لانه في حالة كسل ،

حاولوا يوميا تزيدون على وجبتكم الاساسية ملعقة بعد ماتشبعين هالحركة تساعدك كل يوم تزيدين شوي بأكلك بدون ماتصابين بالتخمة

ثاني خطوة :

النوم الملخبط أكبر دمار لجسمك وصحتك غير كذا يخرب مزاجك ويتلخبط نظام أكلك كله , جربي فقط أسبوعين تعدلين نومك وتنامين 6 إلى 8 ساعات بتلاقين شهيتك مفتوحة أكثر وكمية أكلك بتكون أكبر .

،

النوم الجيد له فوائد كثيرة أهمها :

1- يزيد الطاقة بجسمك

2- مهم للجهاز العصبي 

3- ينشط لك الذاكرة 

4- مهم للرياضين خصوصا حتى ترتاح العضلة وبالتالي تبني نفسها 

،

أضرار قل النوم والسهر الطويل :

1-الكسل و العصبية

2- السواد تحت العيون | اللي نص البنات يعانون منها 

3- يعيشك بأرق ويصير نومك دايم متوتر 

4- مايساعدك على التغير ويأثر عليك لو كنتي رياضية

،

نصائح تساعدك على تعديل نومك :

1-قللي المنبهات من بعد العشاء | شاي وقهوة 

2- سوي أعمالك المهمة في وقت مبكر عشان ماتنشغلين فيها الليل ويروح الوقت

3- من الساعه 10 خليك بغرفة النوم وخففي الإضاءة عشان | يجيك النوم

4- أنوي أنك تنامين بدري عشان ماتضيعين صلواتك وبيعينك الله 

5- تجنبي الوجبات الثقيلة قبل النوم عشان ماتغتثين 

ثالث خطوة :

كثير بنات إذا قلت لهم سوو رياضة أنصرعوا علي وقالوا : تستهبليين !!!! تبينا ننحف زياد ؟

وهالشي بسبب الثقافة القليلة والمفهوم السائد عن الرياضة وأنها للسمان وماعرف إيش وغير مقتنعين تماما بفكرة الرياضة

 م أقول الا | الله يسامح حسابات الدايات اللي لعبت بعقولكم | , والمصيبة الأكبر إذا قالت لي وحدة : الرياضة ماتصلح للبنت ممكن تخرب | عذريتها أو تأثر على رحمها ... الخ | لحظة حبيبتي شوية تركيز معي مافيه أي معلومة : طبية و لا علمية و لا ثقافية تثبت ضرر الرياضة بالعكس كثير أطباء ينصحون حتى الحامل قبل ولادتها أنها تسوي رياضة حتى تساعدها بأنها تولد بإذن الله بسهولة .

لازم تفتحون عقولكم وتتثقفون وتقرون لاتخلون فلانه وعلانه تفكر عنكم أو تاخذون من غيركم المعلومة و| تعاملونها معاملة القران المنزل اللي مايشوبه خطأ ولاتدليس | لازم بنفسك لي سمعتي عن معلومة تبحثين عشان تكونين مصدر جيد لمعلوتك بدون ماتقولين سمعت من فلانة خصوصا مع كثرة المخادعين بمواقع التواصل واللي ينسخون معلومة لكم ويلصقونها بدون حتى مايتأكدون من صحتها .

التمارين المناسبة لك كنحيفة |

النحيفة تعتمد على تمارين المقاومة ( مثل : السكوات + البوش آب + أي تمارين نستخدم فيها أثقال )عشان تبني عضل وبالتالي تكون زيادة وزنك بجسم مرتب وبيرفكت , وتمارين الكارديو ( القلبية ) مثل : القفز والجري والمشي يفضل ماتكون الا مرة بالأسبوع نحتاجها لرفع لياقتنا لكن كثرتها تحرق الدهون والسعرات .

نصائح مهمة |

-          الرياضة لاتسوينها الا بذهن صافي وإستعداد

-          لاتسوين أي تمرين بطريقة عشوائية لابد تكونين فاهمة وواعية للي قاعدة تسوينه

-          أبحثي واقري وأطلعي ومع الوقت بيكون كل شي سهل

-          وقت تمارينك لاتنشغلين بالجوال أو السوالف مع أحد لابد تكونين مركزة زين

 أطلعوا على هالموضوعين حتى تستفيدون أكثر 

أنواع التمارين الرياضية : WORKOUT
المبتدئات بالرياضة | التمارين المناسبة لك

رابع خطوة :

أغلب مشاكل النحافة وفقدان الشهية بسبب | العصبية و القلق و التفكير الزايد والإنشغال بالأخرين  والتوتر

عشان تشوفين تغير حقيقي لابد تبدين تغير نفسك للأفضل داخليا كلنا نمر بضغوطات وأيام صعبة لكن نحاول نتخطاها مسألة تجلسين أيام طويلة زعلانة عشان فلانة رمت عليك كلمة أو عشان شفتي تصرف ماعجبك من أحد هذي تضيع لك عمرك وشبابك على الفاضي تمشي الحياة ويعيشون الناس وأنتي تبقين على حالك بدون تغير .

نصيحة بقدمها لك على طبق م ذهب نصيحة من إنسانة كانت مثلك مزعلة نفسها وشايلة هم الدنيا على راسها  | عمرك بتعيشينه مرة عيشيه بحب وراحة وحب لنفسك | .

مجرد غيرت من نفسي الحمدالله كل حياتي تغيرت صرت إنسانة ثانية شفت أني أستحق الأفضل وسعيت أن نفسي تكون دائما في المقام الأول وم أرضى بأقل من هالشي | مش نرجسية أبدا قد ماهو إيمان عميق بنعم الله علي |

لما صحيت على نفسي أكتشفت أن اشياء كثيرة ضيعت وقتي عليها وهي تافهه . أكتشفت أني ضيعت أوقات كثيرة كنت أقدر أستمتع فيها لو ماعطيت مزاجي فرصة أنه يعكر علي وحساسيتي الزايدة اللي كانت مخربة كل شي ممتع .

لو ماتغيرت من الداخل كان الأن أنا م أكتب لكم شي بهالمدونة ولافتحت حساب ولا سناب | فالحمدالله على نعمة راحة البال |

نصائح للراحة النفسية :

1- تقربي من الله في الرخا والشدة بالعبادة وأحرصي على صلاتك بوقتها

2- أكثري من التأمل | أجلسي جلسات صفاء مع نفسك وتأملي الطبيعة وأسمعي صوت نفسك

3- أشغلي وقتك بالمفيد | هواية تحبينها أو عمل تطوعي أو برامج مفيدة

4- فرغي ضغوطك دائما بـ | الصلاة و التلوين و المشي هذي سبل مفيدة لتخفيف التوتر

5-اقرئي ثم اقرئي القراءة غذاء الروح بدال ماتنشغلين بالناس أنشغلي بنفسك بتثقيفها

6- ابتعدي عن الأشخاص السلبين وابدي صفحة جديدة مع أشخاص إيجابين مشجعين لك

خامس خطوة :

اهتموا بالاكل العالي بالقيمة الغذائية والصحي وابتعدوا عن أكل المطاعم اللي ماراح يزيدكم الا دهون وتشققات . واستبدلوا المشروبات الغازية بالعصائر الطازجة والسموذي لأن السموذي صحي جدا وعالي بالسعرات اللي ممكن توصل ل ٤٠٠ سعرة او اكثر وقللوا من القهوة والشاهي . 

مثال على بعض الأطعمة اللي تقدرون تضيفونها ليومكم :

مو ضروري يكون الأكل دسم عشان يفيدنا احيانا السناكات الخفيفة هي اللي تساعدنا بزيادة السعرات مع الاستمتاع فيها
الاشياء الموجودة بالصورة مفيدة وصحيّه وتنفع كسناك او فطور او حتى مع العشاء لو حابين لاتكونون كسولين وتبحثون وقت الفراغ عن الشبسات والعصاير الجاهزة اللي كلها سكر بسكر هذي ماراح تفيدكم شي
حبو جسمكم عشان تخافون عليه من أي شي ضار .
,
العسل فاتح شهيّة ممتاز  +

البطاطس المسلوق مع شوية زيت زيتون قنبلة سعراات + 

 الافوكادو مليان دهون صحيّة وحبة وحدة فيها فوق ال ١٥٠ سعرة !!!فكيف لو نسوي منه سموذي + 

التمر طعام الرسول ومحبوب الجميع حبّة وحدة فيها حدود ال ٢٥ سعرة اللي يميز التمر انه غني بالسكر اللي يحتاجه الجسم وهالشي بعد ينطبق على الفواكه لو سويتوها عصير +
المكسرات وم أدراك م المكسرات اوميقا ٣ و دهون صحيّه وبروتينات ومن اهم المكسرات ( الكاجو ، الفول السوداني ، اللوز ، عين الجمل ، الفستق  )

زيت الزيتون تقدرون تضيفونه مع السلطات وممكن مع البطاطس المسلوق او مع الزعتر وتدهنون فيه التوست ملعقة وحدة فيها ١٢٠ سعرة ويعتبر دهون صحيّه  +

،

أغلب هالاشياء لك الحمد ياربي موجودة بالبيوت ومتوفرة يعني  محد له حجة يقول ماعرف وش أكل ، مازاد النحيفات نحف الا الكسل اللي ذابحهم مع الاسف  وهالشي لاحظته فكثير بنات مهما اكتب لهم وابسط لهم الاكلات الا انهم يشوفونها شي عظيم وبياخذ وقت وهي كلها فواكه تغسلها وتقطعها وتاكلها
لما تفكرون جديا تتغيرون فعل مو مجرد كلام راح تشوفون ان بدأتم تهتمون فعلا بصحتكم لأن هي الاهم .

سادس خطوة :

إيش يعني الصبر :

الصبر يعني تصبرين تجاهدين نفسك وكسلك تتعبين ووتتوكلين على الله, تذكري أن مافي شي يجي بيوم  وليلة وأعزمي على التغير وثقي أن أنتي الوحيدة القادرة على تحقيق هدفك و حسابي ماهو الا بذرة صغيرة اصرارك وعزيمتك هو الأهم وهو اللي راح يكبر هالبذرة لحد ماتزهر , اتعبي على جسمك عشان تلاقين نتيجة مرضية  ولاتعتقدين التغير يحصل بيوم وليلة التغير يحتاج صبر على | النتائج

إيش يعني الإستمرار :

مشكلة أغلبكم تستمر يومين ثلاثة أسبوع وبعدها تجيني محبطة أنا بترك كل شي لأني ماشفت نتيجة !

هنا أقولها اتركي بسلامتك ولا أرد عليها ثانية والسبب |ماحب أضيع وقتي على أشخاص غير مستعدين يستمرون وعجولين + الجسم مش آلة بيوم بيتبرمج ويغير كل شي لو الأمر بهالبساطة

كان من زمان اللي يسون دايت بيومين نحفوا واللي يبون يزيدون وزنهم بيومين وصلوا الوزن المثالي .

أقل شي الواحد يستمر أسبوعين وبعدها تبدا النتايج الصغيرة تبان | الصغيرة ركزوا

ليش الرياضين سنين وهم بالنوادي لو الأمر بسيط ماستمروا وتعبوا واجتهدوا .

 الواحد لازم يستمر على هدفه عشان يقدر يحقق نتيجة ترضية .

الاستمرار مو يعني يومين بالأسبوع أكلك يكون تمام وعشرة لا . الاستمرار يعني عشرة أيام أكلك تمام ويومين لا

إيش يعني الواقعية :

يعني لاتحطين في بالك أنك لازم بأسبوع تزيدين | 4 كيلو

الجسم مهيأ للتغير لكن بحدود المعقول هالرقم نوصله بشهر مش بأسبوع فلا بد تكونين واقعية بأهدافك وتحطين | هدفك القريب مثلا بأسبوع كيلو أو نصف كيلو .

لأن دائما سبب أحباطكم هو الأرقام الفلكية اللي تبون توصلونها بوقت قصير وهالشي غلط .

سابع خطوة :

مافي أحد يقدر يتفوق على القارئ

كل اللي اكتبه وأنزله لكم مادرسته ولاتعلمته لكن عرفته بالتجربة والبحث والتدوين

اللي ساعدني فعلا على زيادة وزني | بحثي المتواصل وقرائتي في كل شي يخص زيادة الوزن والرياضة

يعني مستوعبين معي كيف القراءة خلت مني شخص منجز ؟ كيف البحث والتدوين خلوني أقدر الآن أكتب لكم معلوماتي وأنا كلي ثقة أنها بتفيدكم ..!!

عمركم لاتبخلون على نفسكم بالثقافة سواء في | الرياضة أو الغذاء الصحي عشان محد يتفلسف عليك J

كثير مايقرئون اللي أتعب في كتابته وتلخيصه ويجوني على الخاص يبوني أكلمهم شخصيا وأختصر لهم وأضيع وقتي عليهم رغم أني دائما أبسط المعلومات بدون فلسفة علمية أو كلام صعب حتى يوصل للجميع لكن مع الأسف مازال هناك أشخاص أعتبرهم | عاااالة . وما أقصد اللي يصعب عليهم فهم نقطة معينة أو يسألوني عن استفسار بسيط . أتكلم عن اللي اقولها اقري المكتوب أو ابحثي أنا منزلة الموضوع وتقول لي | أنتي منشنيني أو قوليه لي

هذا أعتبره إتكالية | وهالنوعية مستحيل يتغيرون للأفضل لأن المعلومة تجيهم بدون مايتعبون عليها ويبونها ملخصة بأتفه طريقة فأكيد مع الوقت راح ينسون لأن أساسا نصهم ضاع وقتي عليهم من شهور وللآن مابدوا |

,

الآن صار فيه ( مدونات + حسابات أنستقرام + يوتيوب + تويتر + فيس بوك ) مواقع كثير تعطيك المعلومة وأنتي منسدحة لا كتاب تدورينه وتشترينه ولاتخسرين فلوسك يعني مالكم حجّه أبد فأنكم ماتثقفون نفسكم ، وأي كسل يصدر منكم فهذا لأنك كسولة وانتي  اللي ماتبين نتيجه ترضيك

.

.

الموضوع طويل شوي وأخذ مني وقت وجهد ماتتخيلونه عشان أقدر أوصله بأسهل صورة أتمنى فعلا يفيدكم

وكل وحدة تكتب لي كم وزنها وكم حابة توصل ؟

7 comments زيادة الوزن