أنواع التمارين الرياضية : WORKOUT


راح أشرح لكم في هذا البوست عن أنواع الرياضة :
عشان وقت ماتختارين تمارينك الرياضية تكونين على خلفية مسبقة بأهميتها و إيش تستهدف في جسمك بالضبط , ضروري
 تقرأين عشان تعرفين ماينفع تجين وتطبقين معي التمارين وأنتي مو فاهمة  وش تسوين وإيش هذا التمرين يستهدف  .
,

أول نوع : تمارين الكارديو ( القلبية )
من أسمها ( القلبية) يعني :
أنها تعمل على رفع نبضات القلب بسرعة ولما توصل لحد معين تحرق الدهون لك يعني تحتاجين وقت لحد ماتحرقين مو من كم خطوة او دقيقة تتوقعين انك خسرتي وزن  . وغير كذا ترفع لك اللياقة وما تتعبين وأنتي تفرفرين بالسوق أو تصعدين الدرج وتخليك مروقة
ومن أمثلتها : الجري , الهرولة , الزومبا , حبل القفز , الركض , ركوب الدراجة
وأنتِ كفتاة جميلة نحيفة يفترض فالهرولة أو المشي ماتتعدين النصف ساعة فقط عشان مايبدا جسمك يحرق السعرات لكن اللي حابة تنحف وزن فالهرولة أو الزومبا ضروري تزيد المدة للساعه . يعني العملية عكسية بينك وبين السمينة 
مهمة التمارين القلبية :
1- تساعدك في رفع لياقتك 
2- تزيد نبضات قلبك وتقوي لك العضلة 
3- تساعدك على حرق الدهون 
4- تجعلك أكثر نشاط وسعادة

ثاني نوع : تمارين المقاومة
هالتمارين مهمة جدا لك لأنها :
1- تعمل على زيادة الكتله العضلية في جسمك ومنها يتحسن شكل الجسم 
2-تقدرين تستخدمين فيها أوزان ( دامبلز , أثقال ) أو حتى تعتمدين فيها على وزن جسمك 
3- تزيد قوتك الجسدية وتصيرين قوية 
4-  وتقدرين تركزين على عضلة معينة بتمارين التقوية اذا حابة تبنينها طبعا 
ضروري بعد تسوينها لكامل جسمك عشان ماتقوين منطقة بينما منطقة ثانية بجسمك تكون ضعيفة و لا تعتقدين أنك بتعضلين أو بيطلع لك عضلات لأن هذا مستحيل يصير هرمون التضخيم هرمون ذكوري يعني ماعند الأنثى هالهرمون وحتى اللي تشوفونهم حقين كمال الأجسام يستخدمون أبر وأشياء زيادة تحفز هالهرمون 
أنواع تمارين المقاومة : 
1- التمرين بالاعتماد على وزن الجسم
من التمارين اللي تعتمدين فيها على ثقل جسمك : البلانك , البوش آب , العقلة 


2- التمرين بالاعتماد على الأوزان الحرة 

يعني تتمرنين باستخدام الدامبلز أو الباند ( المطاطات ) أو البار وتستهدف لك أحيانا أغلب عضلات الجسم أو العضلة اللي تبين
مثل : السكوات وتمارين الباي والتراي  .

3- التمرين بالاعتماد على أجهزة النادي 

أجهزة النادي لها دور كبير في ترتيب الجسم وتقسيم العضلات وهالشي لتنوعها ولوجود مدرب يساعدك .
ثالث نوع : تمارين المرونة
من أسمها يعني أنها تعطيك مرونة ومن وظايفها :
1-  تحسن مزاجك 
2- تضبط لك النفس وتخليك تتحكمين بنفسك 
3- تخلصك من التوتر وشد الأعصاب والضيقة لو كنتي أنسانه عصبية :/ 
ولها أنواع عديدة واليوتيوب بحر أنتي اختاري منه اللي تبين مثل ( بيلاتس , يوقا ’ إطالة)

0 comments:

إرسال تعليق

Top